غربل اليل سارية

ياشمس وينك طول الليـل طلـي
طلي بفجرك غربل الليل ساريـه

في عيني الغدرى ونورك ضياً لي
وبقلبي اللهفه لشوفـك وطاريه

ابطى مجيّـك والحـراوي تملـي
الدار وحشه والبطى له مشاريـه

يا الجادل اللي تلـت القلـب تلـي
اخذت زمام امره وعيت تداريـه

بسباب نظرة جيت مذبوح كلي
رمش العيون السود صعب ٍ نجاريه

عين المها لاسلت الرمش سلي
تطعن بها قلب الشقاوي وتفريه

جرحتني يابوالرموش المظلي
والجرح ماغيرك من الناس يبريه

القلب يشكي والمدامع تهلي
والحال من عقب المواليف زاريه

يا صاحبـي ذا هجـر والا تغلـي
ما تروي البستان يوم انت ذاريـه

رحلت عن عيني ولا اشفيت غلي
والليل لي عاده بصحبة قماريـه

هجرك ضما بسبابه القلب علّي
يامنبع اعيانه وروضة صحاريه

متى يبين النور يا ليل يالي
لا غابت انواره تبسم ضواريه

الجسم من زود العنا مضمحلي
والحال تطويه الليالي وتهريه


واللي حياته بين نارين تصلي
ما حس من بالظل في حر ناريه

من غاب زولك يا بعد كل من لي
جيش الهموم اسكن بقلبي شباريه

وان شفت زولك طاير السعد هلي
ياحي ذاك الزول واللي يطّريه

صابر على الهجران والصبر ملي
شوفك بنارالشوق لازلت حاريه

وان كان شوف اشراقتك ماحصلي
ابيع قلبي لو في الناس شاريه

يا شمس وينك طول الليل طلـي
ليل ٍ بهيـم وغربلتنـا غداريـه